Party

ევროვიზიიდან ახალმა დაბრუნებულმა დიმა ბილანმა ჟურნალისტებს იმ ინტრიგების და სკანდალების შესახებ გვიამბო, რაც მისი მისამართით იხლართებოდა კონკურსის მსვლელობის დროს კულისებს მიღმა.

რას იტყვით ევროვიზიის კონკურსის შესახებ? როგორი იყო კონკურსისთვის მზადების პერიოდი?

საშინლად დატვირთული, ევროვიზიაზე სკანდალს ვერ გაექცევი. ის ყოველთვის თან სდევს მსგავს კონკურსებს, არც ეს წელი იყო გამონაკლისი. ყველაფერი იმით დაიწყო, რომ ჩვენი თვითმფრინავი დააყოვნეს უკრაინაში, მერე ერთ-ერთი გენერალური რეპეტიციის დროს უცებ გაჩერდა ფონოგრამა და მე რამდენიმე წამი მომიწია ფონოგრამის გარეშე სიმღერის გაგრძელება, გამოსვლის წინ კი, ჟენიას (ევგენი პლუშენკოს) ციგურებში ბრიტვები ჩაულაგეს, მსგავსი რამ ჯერ არავისთვის გაუკეთებიათ. თვალები ამეხილა - ადრე ვფიქრობდი, რომ ევროვიზია ოლიმპიადას გავდა, ყველა ერთმანეთს მხარს უჭერდა და ამხნევებდა, ხოლო ვინც შემდეგ წააგებდა, უბრალოდ იგონებდა ამ სკანდალებს, რომ საკუთარი თავი გაემართლებინათ. ახლა დავრწმუნდი, რომ ისინი არ ცრუობდნენ.

როგორ მოქმედებს თქვენზე ამგვარი წინააღმდეგობები?

მე ოპტიმისტი ვარ, ვცდილობ ყველაფერს კარგი კუთხით შევხედო. მაგალითად, ნახევარფინალის შემდეგ კენჭისყრის დროს მე შემხვდა 24 ნომერი, ეს ციფრების მაგიაა, ფინალი 24 რიცხვშია, ჩემი დაბადების დღეც 24 რიცხვშია.... ბევრი პარალელის გავლება შეიძლება, მთავარია იყო ოპტიმისტი. ჩემთან მოვიდნენ რუმინელი შემსრულებლები, რომლებიც პირველი ნომრით გადიოდნენ და შემომთავაზეს მათთვის ნომერი გამეცვალა, მე სევდა და ნერვიულობა დავინახე მათ თვალებში, გაცვლა არ მინდოდა მაგრამ დავამშვიდე, ”პირველი ნომერი გამარჯვებულის ნომერია, რა განერვიულებთ - I'm your number one fan…”.

ანუ თქვენ ცრუმორწმუნე ხართ?

არსებობენ უხილავი ძალები, რომლებიც დღითიდღე უფრო მნიშვნელოვანი ხდებიან ჩემთვის (იცინის), საშინლად ცრუმორწმუნე ვარ, მაგალითად თუ ადრე სიმღერის ტექსტი ან სცენარი დამივარდებოდა, ზედ ვჯდებოდი, ახლა ტელეფონი რომ მივარდება, ლამის იმაზეც დავჯდე.

როგორი გრძნობაა ამხელა აუდიტორიის წინაშე გასვლა?

გამაოგნებელი... ამ დროს ცხოვრება თვალწინ ჩაირბენს ხოლმე. გრძნობა, როდესაც სცენაზე გავდივარ, გამაგიჟებელია, ეს სულ სხვა განზომილებაა, სცენაზე გასვლის წინ, ისევე უნდა ჩავიფიქრო სურვილი, როგორც ახალ წელს ზარების ხმაზე. ასე მგონია, რომ ამ სურვილზე ბევრი რამაა დამოკიდებული.

ტელევიზიით თქვენი სიმღერა ”I believe” უმოწყალოდ გააკრიტიკეს, თქვენ როგორ ფიქრობთ, იმსახურებდა თუ არა ეს სიმღერა მსგავს კრიტიკას?

რწმენა მშობლების, შეყვარებული გოგონას მიმართ, მეგობრების მიმართ, ეს ჩემი სიმღერაა - I believe. ის სიკეთეზეა, ანგელოზის გამოცხადებაზე. საერთოდ ძალიან თვითკრიტიკული ვარ და ვთვლი, რომ ეს ჩემი ერთ-ერთი დადებითი თვისებაა, ის არ მაძლევს მოდუნების უფლებას, მე ხომ ყოცელთვის კრიტიკულ გარემოში მიწევს ცხოვრება. ტელევიზიით თქვეს რომ I believe- საშინელი სიმღერაა, მე ერთს ვიტყვი, ეს სიმღერა ძალიან სწრაფად ჩაიწერა, მაგრამ საკმაოდ ხარისხიანად. მათ თარგმნეს ჩემი სიმღერა და ნაწილ-ნაწილ განიხილეს, მაგრამ თარგმანში სიმღერისთვის სულის ჩაბერა და რითმის დალაგება დაავიწყდათ. სკოლის მოსწავლემაც კი იცის, რომ თარგმანის დროს ტექსტი ან ლექსი უნდა გარითმოს. ამ სიმღერის კომპოზიტორი და თანაავტორი ჯიმ ბენსია, მასთან ერთად მრავალი კომპოზიცია ჩამიწერია, მე მისით კმაყოფილი ვარ.

რისი ჩვენება ვერ მოახერხეთ მაყურებლისთვის ევროვიზიაზე და რაზე გწყდებათ გული?

ფეხშიშველი ევროვიზიის სცენაზე გამოსვლა ჩემი კოზირია. მაყურებელმა ეს ვერ ნახა, იმიტომ რომ ტრანსლაცია დაიწყო მაშინ, როდესაც მე უკვე სცენაზე ვიწექი. უნდა გენახათ წამებში როგორ შემოაგორეს უზარმაზარი ხელოვნური ყინულის იატაკი. კომპოზიცია რამდენიმე წუთში ააწყვეს, კულისებს მიღმა ხშირად სასწაულები ხდება.